中國女排八十年代威到盡

最近有套電影上映，叫做《奪冠》，呢套原名叫《中國女排》嘅電影，改編自幾代中國國家女子排球隊嘅故事，唔少人都話套電影好正，因為中國女排係中國人嘅驕傲。

中國女排嘅輝煌傳奇係由八十年代開始，但其實响1979年，中國女排已經首獲亞洲冠軍，首次稱霸亞洲。而到咗八十年代初，由袁偉民執教下嘅中國女排開始騰飛，當時主力球員包括郎平、陳招娣、陳亞瓊、孫晉芳等人。响1981年，中國女排獲得世界盃冠軍，1982年獲得世錦賽冠軍，1984年洛杉機奧運贏得金牌，1985年再次獲得世界杯冠軍，1986年再贏得世錦賽冠軍，响六年間實現咗「五連冠」。可以話，中國女排响八十年代真係威到盡，亦形成中國國民對中國女排嘅一種強烈感情同擁戴。

不過，隨著主力相繼引退，中國女排出現青黃不接情況，由八十年代中後期開始成績下滑，到九十年代更出現低潮時期。直至千禧年代，中國女排先出現復興。